Home Blog Page 437

በሻምፒየንስ ሊጉ ማንቼስተር ሲቲና ቶተንሃም ሆትስፐር ወደ ቀጣዩ ዙር ማለፋቸውን አረጋገጡ

0

አዲስ አበባ፣ ጥቅምት 23፣ 2010 (ኤፍ ቢ ሲ) በአውሮፓ ሻምፒየንስ ሊግ ማንቼስተር ሲቲ እና ቶተንሃም ሆትስፐር የምድብ ተጋጣሚያቸውን በማሸነፍ ወደ ቀጣይ ዙር መቀላቀላቸውን አረጋገጠዋል።

ትናንት ምሽት ከምድብ አምስት እስከ ስምንት የተደለደሉ ክለቦች ተጫውተዋል።

ማንቼስተር ሲቲ ከሜዳው ውጭ የጣሊያኑን ናፖሊ ገጥሞ፥ 4 ለ 2 በሆነ ውጤት በመርታት ፒኤስ ጂን ተከትሎ ወደ ቀጣዩ ዙር አልፏል።

ለሲቲ ኒኮላስ ኦታሜንዲ፣ ሰርጂዮ አጉዌሮ፣ ራሂም ስተርሊንግ እና ጆን ስቶንስ ናቸው የማሸነፊያ ግቦችን ያስቆጠሩት።

ለናፖሊ ደግሞ ሁለቱን ግቦች ሎሬንዞ ኢንሴኜ እና ጆርጂኖ አግብተዋል።

ሰርጂዮ አጉዌሮ በምሽቱ ያስቆጠራት ግብ በማንቼስተር ሲቲ ቆይታው ያሉትን ግቦች፥ 178 በማድረስ የክለቡ ከፍተኛ ግብ አስቆጣሪ ደረጃን እንዲይዝ አድርጋዋለች።

የለንደኑ ቶተንሃም ሆትስፐር ሪያል ማድሪድን በዌምብሌይ ስታዲየም አስተናግዶ፥ 3 ለ 1 በመርታት 16ቱን የተቀላቀለ ሁለተኛው የእንግሊዝ ክለብ ሆኗል።

ለቶተንሃም ዴሊ አሊ ሁለት ግቦችን ከመረብ ሲያዋህድ፥ ቀሪዋን ክርስቲያን ኤሪክሰን በማድሪዶች መረብ ላይ አሳርፏል።

ክርስቲያኖ ሮናልዶ ለዚነዲን ዚዳን ቡድን ከሽንፈት ያልታደገችውን ብቸኛ ግብ ያስቆጠረ ሲሆን፥ በዚህ ዓመት ያገባቸውን የሻምፒዮንስ ሊግ ግቦች ስድስት አድርሷል።

ሊቨርፑል በሞሃመድ ሳላህ፣ በኤምሬ ቻን እና በዳኒል ስተሪጅ ግቦች ኤን ኬ ማሪቦርን 3 ለ 0 በማሸነፍ፥ 16ቱን የመቀላቀል እድሉን አስፍቷል።

ፖርቶ አር ቢ ላይፕዚግን፣ ሻካታር ዶኔስክ ፌይኖርድን በተመሳሳይ 3 ለ 1 ሲያሸንፉ፥ ሴቪያ ስፓርታክ ሞስኮን 2 ለ 1 በሆነ ውጤት ነው የረታው።

ቤሺክታሽ ከሞናኮ እንዲሁም ቦሩሲያ ዶርትሙንድ ከአፖል ኒኮሲያ በተመሳሳይ አንድ ለአንድ ነው የተለያዩት።

ምንጭ፦ቢቢሲ ስፖርት